प्रधानमन्त्री ओलीद्वारा शिक्षण अस्पतालको विस्तारित सेवा भवन उद्घाटन – निरोगी नेपालका लागि गुणस्तरीय स्वास्थ्य सेवामा जोड
काठमाडौं, असार ३०– सम्माननीय प्रधानमन्त्री केपी शर्मा ओलीले त्रिभुवन विश्वविद्यालय शिक्षण अस्पतालको विस्तारित सेवा भवनको आज एक विशेष समारोहका बीच उद्घाटन गर्नुभएको छ। शिक्षण अस्पतालको ४३ औँ वर्ष प्रवेशको अवसर पारेर आयोजित कार्यक्रममा प्रधानमन्त्री ओलीले स्वास्थ्य सेवा क्षेत्रमा सरकारले गरिरहेको प्रयासबारे प्रकाश पार्नुभयो।
प्रधानमन्त्रीज्यूले कार्यक्रममा नेपाल सरकारले ‘निरोगी नेपाल’को नाराका साथ अघि बढिरहेको उल्लेख गर्दै नागरिकलाई सकभर बिरामी नपर्ने गरी जीवनशैली, आहारविहार र पर्याप्त आराममा ध्यान दिन आग्रह गर्नुभयो। उहाँले थपे, “बिरामी भइहाले पनि प्रत्येक नागरिकले गुणस्तरीय, सुलभ र प्रभावकारी स्वास्थ्य सेवा पाउनु पर्छ भन्ने हाम्रो दायित्व हो।”
कार्यक्रममा शिक्षण अस्पतालका पदाधिकारी, स्वास्थ्यकर्मी, पूर्व विद्यार्थी र सेवाग्राहीहरूको उल्लेख्य उपस्थिति रहेको थियो। विस्तारित सेवा भवनले अस्पतालमा बढ्दो सेवाग्राहीको चापलाई व्यवस्थापन गर्न महत्वपूर्ण योगदान दिने विश्वास गरिएको छ।
