एमाले दोस्रो विधान महाधिवेशन सम्पन्न, २९ बुँदे समसामयिक प्रस्ताव पारित
काठमाडौं । नेपाल कम्युनिष्ट पार्टी (एमाले) को दोस्रो विधान महाधिवेशन ललितपुरको गोदावरीमा सम्पन्न भएको छ ।
अध्यक्ष केपी शर्मा ओलीद्वारा प्रस्तुत राजनीतिक प्रस्ताव, उपाध्यक्ष विष्णुप्रसाद पौडेलद्वारा प्रस्तुत विधान संशोधन प्रस्ताव र महासचिव शंकर पोखरेलद्वारा प्रस्तुत सांगठनिक प्रस्ताव सर्वसम्मत पारित गर्दै महाधिवेशन सफलतापूर्वक सम्पन्न भएको हो ।
भदौ २० गते अध्यक्ष ओलीले उद्घाटन गरेको महाधिवेशनमा केन्द्रीय निकायका चारवटा प्रतिवेदनसहित तीनवटा मुख्य प्रस्ताव पारित गरिएको थियो । छलफलका लागि प्रतिनिधिहरूलाई १० समूहमा विभाजन गरिएको थियो ।
अध्यक्ष ओलीले जनताको बहुदलीय जनवाद (जबज) देशलाई अगाडि बढाउने मार्गदर्शक सिद्धान्त भएको स्पष्ट पार्दै समाजवादको आधार तयार गर्ने दिशामा पार्टी अघि बढिरहेको बताए ।
उपाध्यक्ष पौडेलले विधान संशोधन प्रस्तावमा उठेका प्रश्नहरूको जवाफ दिँदै जबजबाट एमाले डिरेल भएको भ्रमको खण्डन गरे । उनले २०८४ को निर्वाचनमा ओलीको नेतृत्वमा बहुमतको सरकार बनाउने लक्ष्य प्रस्तुत गरे । महासचिव पोखरेलले ‘मिसन २०८४’ सफल बनाउन पार्टीलाई एकल बहुमत दिलाउनुपर्नेमा जोड दिए ।
महाधिवेशनले डा. विजय सुब्बाको अध्यक्षतामा २५ सदस्यीय केन्द्रीय निर्वाचन आयोग निर्वाचित गरेको छ । आयोगको उपाध्यक्षमा सानुराज पोखरेल र सचिवमा कुन्साङ लामा छन् ।
साथै, महाधिवेशनले सचिव योगेश भट्टराईद्वारा प्रस्तुत २९ बुँदे समसामयिक प्रस्ताव पनि पारित गरेको छ ।
यी प्रस्तावमा राष्ट्रियता, संविधान संशोधन, कृषि, जलवायु परिवर्तन, भूकम्प पुनर्निर्माण, सुशासन, बसाइँसराइ, शिक्षा, दलित–महिला अधिकार, छुवाछुत अन्त्य, प्रवासी नेपालीको अधिकार, प्रेस स्वतन्त्रता, साइबर सुरक्षा, अन्तर्राष्ट्रिय सम्बन्धलगायतका विषय समेटिएका छन् ।
समग्रमा महाधिवेशनले राष्ट्रिय स्वाधीनता, सामाजिक न्याय, राजनीतिक स्थायित्व र आर्थिक रुपान्तरणका लागि एमालेलाई निर्णायक राष्ट्रिय शक्ति बनाउने संकल्प गरेको छ ।
