हिमाली क्षेत्रमा भारी हिमपात, अप्ठ्यारोमा परेका पर्यटकलाई सहजिकरण गर्दै पर्यटन मन्त्रालय (भिडियो सहित)

काठमाडौं । भारी हिमपातका कारण समस्यामा परेका पर्यटकहरुलाई उच्च प्राथमिकताकासाथ सहजिकरण गरिरहेको संकृति पर्यटन तथा नागरिक उड्ययन मन्त्रालयका प्रवक्ता रामकृष्ण लामिछानेले जानकारी दिनुभयो ।

प्रतिकूल मौसम र हिउँका कारण मनाङ, मुस्ताङ, सोलुखुम्बु लगायतका हिमाली जिल्लामा पुगेका पर्यटकहरूले खाना, बास र आवागमनमा समस्यामा रहेका पर्यटकहरुलाई विभिन्न संयन्त्र मार्फत सहजिकरणको काम गरिरहेको प्रवक्ता लामिछानेले बताउनुभयो ।

प्रवक्ता लामिछानेले आहा नेपालसंग कुरा गर्दै भन्नुभयो ः हालको प्रतिकूल मौसमले पर्यटकहरूलाई समस्या पुर्याएको अवस्थाको समाधानका लागि मन्त्रालयले पर्यटन विभाग, नेपाल पर्यटन बोर्ड, नागरिक उड्डयन प्राधिकरण लगायतका निकायहरूसँग निरन्तर समन्वयमा रही सहजीकरणका कार्यहरू अघि बढाइरहेका छौँ ।

उहाँले मन्त्रालयले ट्राभल एडभाइजरी जारी गर्दै मौसमको अवस्था र सम्भावित जोखिमबारे तथ्यपूर्ण सूचना सम्प्रेषण गर्न सम्बन्धित सरोकारवाला संघसंस्था—हान, टान, नाटा, पाटा लगायतका संस्थाहरूसँग पनि समन्वय गरिरहेको बताउनुभयो। साथै, पर्यटन प्रहरी, स्थानीय सरकार र प्रहरी प्रशासनलाई उच्च सतर्कतामा राखिएको समेत उहाँले बताउनुभयो ।

पर्यटकहरू कतै अप्ठ्यारो अवस्थामा रहेका क्षेत्रमा रहेका होटल तथा रेस्टुरेन्ट व्यवसायीहरूलाई पर्यटकप्रति उच्च सम्मान, सहयोग र सुरक्षा प्रदान गर्न मन्त्रालयले अनुरोध गरेको छ।

यो कठिन समयमा व्यवसायीहरूले पर्यटकप्रति सकारात्मक र सहयोगी व्यवहार देखाउन सके नेपालकै पर्यटन क्षेत्रको अन्तर्राष्ट्रिय छविमा राम्रो बन्ने भन्दै यसतर्फ सबैले सचेत भएर लाग्नुपर्नेमा जोड दिनुभयो ।