यूएईमा रहेका नेपालीहरूको लागि दूतावासले जारी गर्यो सुरक्षा निर्देशन : अफवाह र संवेदनशील सामग्री पोस्ट नगर्न अनुरोध
काठमाडौं – युनाइटेड अरब इमिरेट्स (यूएई) मा रहेका नेपाली नागरिकहरूलाई सुरक्षित र जिम्मेवार रहन यूएईस्थित नेपाली दूतावासले अपिल गरेको छ। दूतावासले सामाजिक सञ्जालमा अफवाह फैलाउने वा संवेदनशील सुरक्षा सम्बन्धी सामग्री पोस्ट नगर्न विशेष अनुरोध गरेको छ।
जारी ‘एडभाइजरी–३’ अनुसार, यूएईमा हालको सुरक्षा परिस्थितिसँग सम्बन्धित भिडियो, फोटो वा अन्य सूचना डिजिटल माध्यममा सेयर गर्दा भ्रम फैलिन सक्छ। त्यसैले दूतावासले नेपाली समुदायलाई सचेत रहन र जिम्मेवारीपूर्वक व्यवहार गर्न आग्रह गरेको छ।
दूतावासले चेतावनी दिएको छ कि गैरकानुनी गतिविधिमा संलग्न पाए १–३ वर्षसम्म कैद र १–२ लाख दिरामसम्म जरिवाना हुन सक्छ। विशेषगरी मिसाइल वा ड्रोन अवशेष जमिनमा खस्दा त्यसको नजिक नजान, फोटो नखिच्न र सार्वजनिक नगर्न पनि अनुरोध गरिएको छ।
यूएईमा बसोबास गर्ने नेपालीहरूले स्थानीय कानुन पालना गर्नुपर्ने र आधिकारिक स्रोतबाट मात्र जानकारी लिनुपर्ने दूतावासको भनाइ छ। आधिकारिक जानकारीका लागि यूएई सरकारका परराष्ट्र, रक्षा र गृह मन्त्रालय, दुबई र अबुधाबी मिडिया कार्यालय र इमिरेट्स न्युज एजेन्सी मात्र प्रयोग गर्नुपर्ने उल्लेख गरिएको छ।
साथै, दूतावासले आफ्ना नागरिकहरूलाई आधिकारिक फेसबुक पेज नियमित हेर्ने र अपडेट जानकारी लिन सुझाव दिएको छ। यसरी दूतावासले यूएईमा रहेका सबै नेपालीलाई सुरक्षित, सचेत र जिम्मेवार भएर बस्न अपिल गरेको छ।
