बीमितलाई विभेद गरे अस्पताललाई कडा कारबाही गर्ने बीमा बोर्डको चेतावनी
काठमाडौं । स्वास्थ्य बीमा बोर्डले बिमित नागरिकहरूलाई सेवा प्रवाहमा सास्ती र विभेद तत्काल नरोके कडा कारबाहीको चेतावनी दिएको छ ।
पछिल्लो समय केही सेवा प्रदायक स्वास्थ्य संस्थाहरूले बिमा गरेका नागरिकहरूलाई सेवा दिन ढिलासुस्ती गर्दै विभेदपूर्ण व्यवहार गरेको गुनासो बढेको थियो । यस्ता कार्य तत्काल रोक्न बोर्डले निर्देशन दिएको हो ।
बोर्डले सबै सेवा प्रदायक स्वास्थ्य संस्थाहरूलाई पत्राचार गर्दै बिमितहरूको हकहित विपरीत कार्य नगर्न सचेत गराएको छ ।
बोर्डका कार्यकारी निर्देशक डा. कृष्ण प्रसाद पौडेलद्वारा जारी सूचनामा भनिएको छ,” यस्ता गतिविधिहरू स्वास्थ्य बीमा ऐन, २०७४ र स्वास्थ्य बीमा नियमावली, २०७५ विपरीत छन् । अनुगमनका क्रममा कुनै पनि स्वास्थ्य संस्थाले नियम विपरीत कार्य गरेको प्रमाणित भएमा स्वास्थ्य बिमा ऐन, २०७४ को दफा (१२) को उपदफा (१) खण्ड –ख) बमोजिम कडा कानुनी कारबाही हुनेछ।”
