छात्रवृत्ति–दिवा खाजा हिनामिना प्रकरणमा प्रधानाध्यापक र अध्यक्षमाथि मुद्दा

कपिलवस्तु जिल्लाको तौलिहवा नगरपालिका–८ स्थित श्री विश्वमैत्री आधारभूत विद्यालयमा छात्रवृत्ति, दिवा खाजा र पाठ्यपुस्तकका लागि विनियोजित रकम हिनामिना भएको आरोपमा विद्यालयका प्रधानाध्यापक विश्वम्भर रैदास तथा विद्यालय व्यवस्थापन समितिका अध्यक्ष दुर्गा थारूमाथि विशेष अदालत काठमाडौंमा आरोपपत्र दायर गरिएको छ।

मिति २०८२ मंसिर १ गते दायर गरिएको उक्त आरोपपत्रमा दुबै जनाले मिलेमत्तो गरी विद्यालय तथा राज्यलाई आर्थिक हानी–नोक्सानी पुर्‍याएको उल्लेख छ।

अनुसन्धानअनुसार, विद्यालयले आ.व. २०७८/७९ मा कपिलवस्तु नगरपालिकाबाट छात्रवृत्ति शीर्षकमा रु. ५१,६००, दिवा खाजाको लागि रु. २,४७,०५० र पाठ्यपुस्तक खरिद शीर्षकमा रु. १,१६,७२९ विनियोजन पाएको थियो।

तर छात्रवृत्ति शीर्षकको रकम एक रूपैयाँ पनि विद्यार्थीलाई वितरण नभएको पाइएको छ। त्यस्तै दिवा खाजामा विनियोजित रकममध्ये जम्मा रु. ९,९०० बराबरको खाजा तीन जना विद्यार्थीलाई मात्र खुवाइएको र बाँकी रु. २,३७,१५० खर्च न भएको देखिएको छ।

पाठ्यपुस्तक शीर्षकमा निकासा भएको रकममध्ये रु. १,७६४.४० बराबरका मात्र पुस्तक तीन जना विद्यार्थीलाई वितरण गरिएको र बाँकी रु. १,१४,९६५.८० रकम उपयोग नभएको विशेष अदालतले उल्लेख गरेको छ।

यससँगै सामाजिक सुरक्षा करबापत खातामा जम्मा गर्नुपर्ने रु. ३९,७१४.९५ समेत नजमाई दुबै जनाले रकम हिनामिना गरेको प्रमाणित भएको आरोपपत्रमा उल्लेख छ।

यसरी विभिन्न शीर्षकका रकम गरी जम्मा रु. ४,४३,४३०.७५ (चार लाख त्रिचालीस हजार चार सय तीस रुपैयाँ पचहत्तर पैसा) हिनामिना गरी सार्वजनिक सम्पत्तिलाई हानी–नोक्सानी पुर्‍याएको ठहर गर्दै विशेष अदालतले भ्रष्टाचार निवारण ऐन, २०५९ को दफा १७ अनुसार कारबाहीको मागसहित आरोपपत्र दायर गरेको हो। अदालतले ऐनअनुसार बिगो असूल, कैद सजाय तथा जरिवाना माग गरिएको जनाएको छ।