नेपाल कृषि सहकारी केन्द्रीय संघ लि. को १८औँ वार्षिक साधारण सभा सम्पन्न

नेपाल कृषि सहकारी केन्द्रीय संघ लि. को १८औँ वार्षिक साधारण सभा सम्पन्न भएको छ । देशभरका १ हजार १ सय ५१ संस्थाका प्रतिनिधिहरुको सहभागितामा भएको साधारणसभामा बोल्नुहुँदै पूर्व मन्त्री एवम् राष्ट्रिय सहकारी महासंघका पूर्व अध्यक्ष  बडालले सहकारी आन्दोलनमा महिलाको भूमिकालाई विशेष रूपमा उल्लेख गर्नुभयो ।

उहाँले सहकारी क्षेत्रमार्फत महिलामा आएको जागरणले नेपाली समाजको रूपान्तरणमा महत्वपूर्ण योगदान पुर्‍याएको बताउनुभयो ।

अध्यक्ष बडालले भारतसहित दक्षिण एसियाली मुलुकहरू—भारत, पाकिस्तान, बंगलादेश र श्रीलंकामा सन् १९०४ मै सहकारी ऐन बनेको स्मरण गराउँदै नेपालले त्यसको ८८ वर्षपछि आफ्नो सहकारी ऐन निर्माण गर्दा देशको आवश्यकता अनुसार परिपक्व र प्रभावकारी कानुन बनाउन सफल भएको जनाउनुभयो ।

छिमेकी मुलुक भारतमा करिब १ अर्ब ४५ करोड जनसंख्या रहेको उल्लेख गर्दै उहाँले त्यहाँ सहकारी क्षेत्रमा महिलाको सहभागिता २० प्रतिशत मात्र रहेको बताउनुभयो ।

अध्यक्ष बडालले प्रारम्भिक तहका सहकारी संस्थामा महिलाको सहभागिता खुला गर्नुपर्नेमा जोड दिँदै यसले सहकारीको दर्शन, सिद्धान्त, मूल्य–मान्यता, आचरण तथा कार्यपद्धतिमा कुनै असर नपार्ने स्पष्ट पार्नुभयो ।

कार्यक्रममा नेपाल कृषि सहकारी केन्द्रीय संघ लि. का अध्यक्ष खेमबहादुर पाठकले सहकारी क्षेत्रको दिगो विकासका लागि सुशासन, पारदर्शिता र महिला सहभागिता अपरिहार्य रहेको बताउनुभयो ।

यस्तै, सहकारी विभागका रजिष्ट्रार सुशिल ढकालले सहकारीको नियमन, सुधार र विश्वास पुनःस्थापनाका लागि राज्यका निकायहरू सक्रिय रूपमा लागिरहेको जानकारी दिनुभयो ।

कार्यक्रममा विभिन्न सहकारी संघ–संस्था तथा सरोकारवाला निकायका प्रतिनिधिहरूको उल्लेखनीय सहभागिता रहेको थियो ।