विद्यालयमा पुस्तक–पोशाक बिक्रीमा महानगरको कडाइ
काठमाडौँ । काठमाडौँ महानगरपालिकाले विद्यालयहरूमा पाठ्यपुस्तक तथा पोशाकको बिक्री वितरणमा नियन्त्रण गर्न निर्देशन जारी गर्दै नियम विपरीतका गतिविधि तत्काल रोक्न सचेत गराएको छ।
महानगरको शिक्षा विभागले आइतबार सार्वजनिक गरेको सूचनामा केही विद्यालयहरूले आफ्नै परिसरबाट पाठ्यपुस्तक र पोसाक बिक्री गर्दै आएकोबारे जानकारी प्राप्त भएपछि यस्तो कार्य बन्द गर्न आग्रह गरिएको जनाइएको छ।
सूचना अनुसार नयाँ शैक्षिक सत्र औपचारिक रूपमा सुरु नहुँदै भर्ना प्रक्रिया अघि बढाउने, पाठ्यक्रम विकास केन्द्रबाट स्वीकृति नलिएका पाठ्यपुस्तक तथा शैक्षिक सामग्री प्रयोग गर्ने, साथै विद्यालयभित्रबाट पुस्तक, अतिरिक्त सामग्री र पोसाक खरिद गर्न विद्यार्थी तथा अभिभावकलाई दबाब दिने जस्ता क्रियाकलाप भइरहेका गुनासाहरू प्राप्त भएका छन्।
महानगरले यस्ता अभ्यासहरू शिक्षा ऐन २०२८, शिक्षा नियमावली २०५९ तथा काठमाडौँ महानगरपालिका शिक्षा ऐन २०७५को मर्मविपरीत हुने स्पष्ट पारेको छ।
निर्देशन उल्लंघन गर्ने विद्यालय सञ्चालकविरुद्ध प्रचलित कानुनअनुसार कारबाही गरिने चेतावनीसमेत महानगरले दिएको छ।
