प्रधानमन्त्री केपी ओली झापा पुगेपछि रास्वपाको हस्ताक्षर अभियानमा प्रहरी हस्तक्षेप, माइक तोडफोड
झापा, असार २९ — प्रधानमन्त्री केपी शर्मा ओली झापा पुगेकै दिन राष्ट्रिय स्वतन्त्र पार्टी (रास्वपा) ले सञ्चालन गरिरहेको हस्ताक्षर संकलन अभियानमा प्रहरीले हस्तक्षेप गरेको छ। झापाको विर्तामोडस्थित प्रमुख चोकमा चलाइएको उक्त अभियानमा प्रहरीले न केवल हस्तक्षेप गरेको, तर अभियान सञ्चालनका लागि प्रयोग भइरहेको माइकसमेत तोडफोड गरेको रास्वपाका स्थानीय नेताहरूले बताएका छन्।
रास्वपाले पार्टी सभापति रवि लामिछानेमाथि सरकारले गरेको ‘राजनीतिक प्रतिशोध’ विरुद्धमा देशव्यापी हस्ताक्षर संकलन अभियान सञ्चालन गर्दै आएको छ। सोही अभियान अन्तर्गत झापामा पनि सयौँ सर्वसाधारणको सहभागितामा कार्यक्रम सञ्चालन भइरहेको बेला प्रहरीले हस्तक्षेप गरेको हो।
रास्वपाका जिल्ला संयोजक भरत बास्तोलाले प्रहरीको उक्त कदमलाई अमानवीय र अलोकतान्त्रिक भन्दै कडा विरोध जनाएका छन्। ‘हामी शान्तिपूर्ण रूपमा नागरिकको अधिकारको संरक्षणका लागि आवाज उठाइरहेका थियौँ, तर प्रहरीले हामीलाई दमन गर्यो,’ संयोजक बास्तोलाले भने। उनका अनुसार प्रहरीले माइक र स्पिकर तोडफोड गर्नुका साथै केही कार्यकर्ताहरुलाई धकेलेर हस्ताक्षर संकलन रोक्न धम्कीसमेत दिएको थियो।
कार्यक्रम स्थल नजिकै प्रधानमन्त्री केपी ओलीको स्वागतका लागि सुरक्षा व्यवस्था कडा पारिएको थियो। सोही क्रममा प्रहरीले रास्वपाको अभियानलाई अवरोध गरेको हो भन्ने आरोप रास्वपाका नेताहरुले लगाएका छन्। प्रहरीले भने सुरक्षा कारणले भीड जम्मा हुन नदिन मात्रै आग्रह गरेको र त्यस क्रममा केही हुलमुलका कारण माइक भाँचिएको जस्तो देखिएको हुन सक्ने बताएको छ।
देशका विभिन्न भागमा चलिरहेको यो हस्ताक्षर अभियानमा हालसम्म लाखौँको संख्यामा हस्ताक्षर संकलन भइसकेको र करोडौँ रकम चन्दा संकलनसमेत भइसकेको रास्वपाले दाबी गरेको छ। पार्टीका अनुसार यो अभियान अझै केही साता निरन्तर चल्नेछ र सरकारले रवि लामिछानेमाथि लगाएको मुद्दा तत्काल फिर्ता लिनुपर्ने माग राखिनेछ।
रास्वपाले सरकारले दमनको बाटो रोजे पनि आफूहरु जनताको पक्षमा लोकतान्त्रिक र शान्तिपूर्ण संघर्ष जारी राख्ने बताएको छ। पार्टीले प्रहरी हस्तक्षेपको विरोधमा आन्दोलनका थप कार्यक्रम सार्वजनिक गर्ने तयारीसमेत गरिरहेको जनाएको छ।
