सहकारी आम प्रशिक्षण कार्यक्रम कञ्चनपुरमा सम्पन्न

काठमाण्डौ । साना किसान विकास लघुवित्त वित्तीय संस्था लि.का अध्यक्ष खेम बहादुर पाठकले आर्थिक रुपान्तरणका लागि कृषि र किसान लक्षित कार्यक्रमलाई अझै प्रभावकारी रुपमा अगाडि बढाउनुपर्ने बताउनुभएको छ ।

साना किसान विकास लघुवित्त वित्तीय संस्था लि. को आयोजनामा कञ्चनपुरमा भएको कार्यक्रममा बोल्नुहुँदै अध्यक्ष पाठकले ग्रामीण क्षेत्रमा आर्थिक उपार्जनको मुख्य स्रोत कृषि तथा पशुपालन रहेको भन्दै यसका लागि स्थानीय, प्रदेश र संघीय सरकारले विशेष कार्यक्रम र बजेटको व्यवस्था गर्नुपर्नेमा जोड दिनुभयो ।

नेपाल कृषि सहकारी केन्द्रीय संघ लि. का अध्यक्ष र राष्ट्रिय सहकारी महासंघका उपाध्यक्ष समेत रहनु भएका पाठकले कञ्चनपुरका २० वटा सहकारी संस्थाका सञ्चालक, लेखा सुपरिवेक्षण समिति, कर्मचारी र सदस्यहरु ४ सय २० भन्दा धेरैको सहभागितामा भएको आम प्रशिक्षणमा सबैभन्दा पहिले आफु र आफ्नो संस्था राम्रो बनाउन सबैलाई अपिल गर्नुभयो ।

आफ्नो संस्था राम्रो बनाउन लाग्नुस उहाँले भन्नुभयो अरुलाई भन्नुभन्दा पहिले आफ्नो संस्था ठिकठाक रुपमा राख्नुस ।

संस्थाका सञ्चालकले सञ्चालकको जिम्मेवारी र दायित्व राम्रोसंग निर्वाह गर्ने, कर्मचारीले आफ्नो जिम्मेवारी र दायित्व निर्वाह गर्ने, लेखा समिति र सदस्यहरुले पनि आ—आफ्नो जिम्मेवारी र दायित्व सहि ढंगबाट निर्वाह गर्ने हो भने सहकारीमा कुनै समस्या नआउने अध्यक्ष पाठकले बताउनुभयो ।

आम प्रशिक्षण कार्यक्रम मार्फत सरकारी प्रति रहेको धारणा परिवर्तनका लागि साना किसान विकास लघुवित्त वित्तीय संस्था लि. ले देशव्यापी आम जागरण तथा प्रशिक्षण कार्यक्रम सञ्चालन गरिरहेको छ ।

कार्यक्रममा लघुवित्तका सञ्चालक सुखदेव न्यौपाने, केन्द्रीय संघका सञ्चालक धर्म कुँवर, प्रदेश र जिल्ला संघका पदाधिकारीहरुको समेत सहभागिता रहेको थियो ।

यसैगरी साना किसान विकास लघुवित्त वित्तीय संस्था लि. का मुख्य प्रवन्ध लिलाधर धिताल, साना किसान विकास लघुवित्त वित्तीय संस्था लि. को शाखा कार्यालय अत्तरीयाका शाखा प्रमुख हिम्मत बहादुर बम लगायतको सहभागिता रहेको थियो ।