गुगल जेमिनीको नयाँ फड्को: अब एआईबाटै सित्तैमा स्याट परीक्षाको तयारी गर्न सकिने
काठमाडौं । आर्टिफिसियल इन्टेलिजेन्स (एआई) को प्रयोगलाई लिएर विश्वभर बहस चलिरहेका बेला गुगलले विद्यार्थीका लागि उपयोगी हुने नयाँ फिचर सार्वजनिक गरेको छ। गुगलको एआई च्याटबट ‘जेमिनी’ ले अब विद्यार्थीहरूलाई स्याट परीक्षाको तयारी गर्न निःशुल्क अभ्यास सेट र व्यक्तिगत कोचिङ प्रदान गर्ने भएको छ।
उच्च शिक्षाका लागि अमेरिका लगायतका देश जान चाहने विद्यार्थीहरूलाई लक्षित गर्दै ल्याइएको यस सुविधामार्फत प्रयोगकर्ताले जेमिनीसँग सिधै अभ्यास परीक्षा माग गर्न सक्नेछन्। यसका लागि कुनै जटिल ‘प्रम्प्ट’ को आवश्यकता पर्दैन। जेमिनीले पूर्ण परीक्षा सेट उत्पन्न गर्नुका साथै ग्राफ, स्कोर विश्लेषण र अन्तरक्रियात्मक बटनहरू सहितको इन्टरफेस उपलब्ध गराउनेछ।
विश्वसनीयताका लागि सहकार्य एआईले दिने सूचना गलत हुन सक्ने जोखिमलाई मध्यनजर गर्दै गुगलले यस फिचरका लागि विश्वप्रसिद्ध शैक्षिक संस्था ‘द प्रिन्सटन रिभ्यू’ सँग सहकार्य गरेको छ। यसले गर्दा जेमिनीले उपलब्ध गराउने प्रश्नहरू वास्तविक स्याट परीक्षाको ढाँचासँग मिल्दोजुल्दो र भरपर्दो हुने सुनिश्चित गरिएको छ।
पढ्ने नयाँ तरिका जेमिनीको नयाँ ‘प्र्याक्टिस मोड’ मा विद्यार्थीले प्रत्येक प्रश्नको उत्तरको विस्तृत व्याख्या हेर्न पाउने छन्। परीक्षा सकिएपछि एआईले विद्यार्थीको कुन विषयमा कमजोरी छ र कहाँ सुधार गर्नुपर्छ भन्ने बारेमा समेत सुझाव दिनेछ।
हाल स्याट परीक्षाका लागि मात्र उपलब्ध यो सुविधालाई भविष्यमा अन्य विभिन्न प्रतिस्पर्धी परीक्षाहरूमा पनि विस्तार गर्ने गुगलको योजना छ। यो नयाँ प्रविधिले विशेषगरी ११ औं र १२ औं कक्षामा अध्ययनरत र विदेशमा स्नातक पढ्न चाहने विद्यार्थीहरूलाई ठूलो सहयोग पुग्ने विश्वास गरिएको छ।
